Ik heb al vanalles doan mien leaw’n ma het mooiste werk wa’k heb had was bie de gemeente. Doar bin ik oetgreuid tot veurwerker en ik mos doar werken met Bats.
As der ne boom pot’mos wön dan mos ik tegen Bats zeggen woar de koel mos kom’ en dan mos Bats de koel greaw’n.
Bats was genne vluggen in zien werk, dat was vaak nig zo slim ma mangs kwam dat slecht oet as’t effen echt gebeuren mos.                                                                          Ik wees Bats een moal an woar ne boom pot’ mos wön en Bats begun met zien schupke an ’t karwei.                                                                                                     Noa aanderhalf uur was der nog nig völ groond vezat en ik zeg tegen Bats: Ie möt in de koel springen en dan der wier oet. Bats sprung in de koel en der wier oet.                      Ik zeg: En noe vedan, in de koel en der wier oet, in de koel en der wier oet en zo vedan. Bats ha al een moal of vief mien commando opvolgd en wö’n in keer zo hellig dat he tegen mie zeg: Wat mö’k noe dan, in de koel of der oet?                                                 Ik zeg: Ie möt gewoon vedan goan met in de koel springen en der wier oet want ie brengt meer zaand met an de kloomp’n dan op de schuppe.                                      Bats prebeer’n ok alle dage wal een keer um te veurkom’n dat he an’t werk mos.          Het was nog ma september toen wie een plantsoen an ’t haarken waren, toen Bats op iets hards krabb’n met de haark. He zeg: Der zit vorst in de groond, wie goat in het vorstverlet, wie goat op hoes an!                                                                                      Ik zeg: Wocht is effen, vorst in de groond, noe al?                                                       Wie kiekt effen good, lig doar net oonder de grösmat een projectiel oet ’n twee’n wereldoorlog.                                                                                                                 Bats en ik greawt dat projectiel der hèènig oet en legt dat ding op de bakfiets met ’n peunt alvast op de gemeenteloos an. Ik zeg tegen Bats: Goa ie der effen gestrits op zitten, dat dat ding nig tevöl hen en wier rolt!                                                                   Bats kik mie an en zeg: Ma a’k der op zit en dat ding geet of, wat dan?

Ik zeg: Dan bin ie eerder bie de loos as ik!

Bron: -Fons Platenkamp